Me kërkesë të SPAK, Gjykata e Posaçme e Shkallës së Parë ka firmosur masën e sigurisë “arrest me burg” për kryetarin e bashkisë së Tiranës, Erion Veliaj, për disa akuza të ngritura ndaj tij.
Ndërkohë, për bashkëshorten e tij, Ajola Xoxa, është vendosur masa e “arrest shtëpie”.
Hetimet janë ende duke u zhvilluar, dhe pritet një njoftim zyrtar nga SPAK mbi akuzat dhe hapat e mëtejshëm të procesit.
SPAK nuk ka konfirmuar zyrtarisht pse është shoqëruar Erion Veliaj, por prej muajsh ai po hetohej për katër vepra penale: korrupsion aktiv, korrupsion pasiv, pastrim parash dhe fshehje apo mosdeklarim pasurie.
Së bashku me të, nën hetim pasuror është edhe bashkëshortja e tij, Ajola Xoxa, ndaj të cilës është vendosur masa arrest shtëpie.
Në dhjetor 2024, kryebashkiaku i Tiranës dëshmoi para agjentëve të BKH-së si person që ka dijeni për hetimin e nisur nga Prokuroria e Posaçme.
Më datë 6 dhjetor, agjentët e BKH ushtruan kontroll në shtëpinë e Erion Veliajt dhe sekuestruan telefonin e bashkëshortes së tij, Ajola Xoxës. Me vendim të gjykatës, kontrolle u kryen edhe në studion ‘Harabel’ te ish-Blloku, ku u sekuestruan dhe dokumente.
