Kryetari i Partisë Demokratike, Sali Berisha ditën e sotme ka zhvilluar një takim me shqiptarët në Parma, Itali.
Duke iu drejtuar shqiptarëve që jetojnë dhe punojnë jashtë, Berisha tha se vota e tyre ka rëndësi të madhe në zgjedhjet e 11 majit.
Me ardhjen e Chris LaCivita në Shqipëri, personit që udhëhoqi fushatën e Donald Trump në SHBA dhe tani do të udhëheqë atë të opozitës, Berisha tha se mesazhi është i qartë.
Ai gjithashtu u ndal tek arrestimi i kryebashkiakur të Tiranës, Erion Veliaj. Sipas kryetarit të opozitës “kryeqyteti ka rënë dhe tani është radha e Edi Ramës”.
Berisha: Kryemagjistari i fitores, i rikthimit më të jashtëzakonshëm në histori, presidentit Donald Trump, ua tha shqiptarëve hapur, jam këtu për të mbështetur PD dhe Sali Berishën për Shqipërinë madhështore, për Shqipërinë aleate dhe mike të vërtetë të SHBA dhe Amerikës. E kishim edhe një zhvillim tjetër shumë madhor.
Në historinë e regjimeve, kur bie kryeqyteti, diktatura është e pashpresë. Ra Tripoli, iku Gadafi. Ra Damasku, iku Asadi.
Ra Tirana, do ikë Edi Rama. Do thyejë qafën Edi Rama. Këtu, kam një nderim të madh dhe në emër tuaj dua të përshëndes ata qytetarë të Tiranës, që në 44 beteja përzunë nga bashkia kryehajdutin e qytetit të Tiranës, Lali Vjedhësin.
Dhe tani, Edi Rama i shastisur, e kuptoi se iku kryeqyteti, iku narkoshteti, përpiqet t’i bindë shqiptarët se qenka standard normal që Velica të ketë garderobën identike me të Lajla Asadit, garderobë e bazuar e tëra tek vjedhjet e taksave të qytetarëve të Tiranës nga Erion Veliaj.
