Mohamed Salah u la sërish në stol nga fillimi, por trajneri i Liverpool-it, Arne Slot, sqaroi se vendimi nuk lidhet me ndonjë problem me lojtarin, por me menaxhimin e forcave dhe balancimin e skuadrës gjatë gjithë ndeshjes.
Sipas Slot, ideja është të ruhet stabiliteti dhe kimia e ekipit, por njëkohësisht të futet freski kur duhet:
“Po hedh në fushë të njëjtin ekip, duke balancuar stabilitetin me freskinë. Sot na duhet i gjithë grupi, sepse disa lojtarë që nisin nuk mund t’i bëjnë 90 minutat. Më shumë se kurrë, na duhet më shumë se 11 lojtarë,” u shpreh ai.
Trajneri theksoi se Salah mbetet një armë e rëndësishme edhe nga stoli:
“Çdo lojtar mund të hyjë në lojë, dhe Mo patjetër është një prej tyre. Është e madhe të kesh lojtarë të këtij niveli në stol.”
Slot vlerësoi edhe profesionalizmin e egjiptianit:
“Nuk folëm gjatë për këtë. Ai sillet si një profesionist i madh dhe jep shembull për ekipin, brenda dhe jashtë fushës.”
Këtë sezon, Salah ka zhvilluar 18 ndeshje në të gjitha kompeticionet, me 5 gola dhe 3 asistime.
