Tre persona janë arrestuar në Fier dhe Mallakastër, në dy raste të ndryshme të lidhura me posedimin dhe përdorimin e armëve të zjarrit.
Në Fier, një 19-vjeçar nga Vlora u arrestua pasi gjatë kontrollit të automjetit që drejtonte, në Bypass-in e Fierit, iu gjet një pistoletë.
Në vijim të hetimeve u arrestua edhe një 28-vjeçar, gjithashtu banues në Vlorë, i cili udhëtonte si pasagjer në automjet. Sipas Policisë, ai dyshohet se kishte dijeni për armën që posedonte shoku i tij dhe se ajo synohej të shitej në Fier.
Ndërkohë, një tjetër arrestim është kryer në Mallakastër, ku një 38-vjeçar, banues në fshatin Lofkënd, dyshohet se ka kanosur me armë gjahu një person pas një konflikti për motive të dobëta.
Gjatë kontrollit në banesën e 38-vjeçarit u gjetën një kallashnikov dhe një armë gjahu, të cilat dyshohet se mbaheshin pa leje dhe ishin fshehur në banesë.
Të tre personat janë vënë në pranga dhe materialet procedurale i janë referuar Prokurorisë për veprime të mëtejshme.
