Mesfushori turk i Real Madrid-it, Arda Guler, ka folur për karrierën e tij, marrëdhënien me trajnerin Xabi Alonso dhe ambiciet e tij për të ardhmen, në një intervistë për “L’Équipe”.
Guler, i cili këtë sezon ka fituar më shumë minuta dhe është bërë një element kyç në skuadrën e Alonso-s, tregoi respektin dhe besimin që ka për trajnerin:
“Qysh në ditën e parë, Xabi më tha: ‘E di që loja jote është instinktive, ti je luftëtar në fushë.’ Ai kërkon karakter dhe agresivitet. Kam besim të plotë tek ai. Nëse një ditë më kërkon të luaj portier, blej menjëherë doreza.”
Ylli i ri turk foli edhe për Kylian Mbappé, duke e quajtur “një talent që duhet lënë i lirë për të zgjedhur ku dëshiron të luajë”. Ai shtoi me humor se nëse francezi luan në qendër, “atëherë më takon mua të luftoj për vendin e tij”.
Guler falënderoi gjithashtu Carlo Ancelottin për mbështetjen që i dha sezonin e kaluar:
“Carlo është një nga trajnerët më të mirë në histori. Ai më ka thënë publikisht se do të bëhem një nga mesfushorët më të mirë në botë. Djali i tij, Davide, më ka ndihmuar shumë. Nuk ishte e lehtë të mos luaja, por ajo periudhë më dha forcë dhe ambicie.”
Në lidhje me presionin mediatik, 19-vjeçari tha se nuk e ndien si barrë:
“Kritikat dhe pritshmëritë më ndihmojnë të përmirësohem. Disa mendojnë se jam shumë i qetë sepse nuk krijoj probleme, por brenda meje kam shumë ambicie.”
Ai tregoi edhe respektin e veçantë për Luka Modric:
“E quaj ‘Abi’, që në turqisht do të thotë ‘vëlla i madh’. Nuk mund ta thërras vetëm me emër.”
Në fund, Guler foli për qëllimin e tij më të madh — fitimin e Champions League:
“Unë nuk e konsideroj titullin e kaluar si timin. Dua ta fitoj vetë një tjetër. Dua që fëmijët në Turqi të thonë: ‘Arda e bëri, prandaj mund ta bëjmë edhe ne.’”
Me talentin, përulësinë dhe vendosmërinë e tij, Arda Guler po tregon se është gati të bëhet një nga yjet e ardhshëm të Real Madrid-it.
