Álvaro Arbeloa ka mbajtur një nga konferencat më të forta të sezonit para El Clásico ndaj Barcelona, duke folur hapur për tensionet e fundit brenda Real Madrid.
Trajneri madrilen doli në mbrojtje të Federico Valverde dhe Aurélien Tchouaméni, pas përplasjes së shumëpërfolur mes tyre në dhomën e zhveshjes. Sipas Arbeloa, të dy lojtarët e kanë pranuar gabimin dhe i kanë kërkuar falje skuadrës, klubit dhe tifozëve.
“Nuk do t’i kryqëzoj publikisht lojtarët e mi. As Valverde dhe as Tchouaméni nuk e meritojnë këtë. Ata kanë bërë shumë për këtë klub dhe përfaqësojnë në mënyrë perfekte Real Madrid”, u shpreh Arbeloa.
Trajneri ishte shumë i ashpër edhe ndaj rrjedhjes së informacioneve nga brenda klubit, duke e cilësuar atë si një akt të rëndë kundër Real Madrid.
“Të nxjerrësh informacion nga dhoma e zhveshjes është tradhti ndaj Real Madrid. Është pabesi absolute ndaj këtij klubi”, deklaroi ai.
Arbeloa mohoi gjithashtu zërat se lojtarët kishin treguar mungesë respekti ndaj tij, duke i quajtur këto lajme të pavërteta.
“Është gënjeshtër që lojtarët më kanë munguar në respekt. Një gënjeshtër absolute. Kur një lojtar nuk futet në fushë, është thjesht një vendim sportiv”, shtoi trajneri.
Pavarësisht situatës së tensionuar, Arbeloa theksoi se vazhdon të ketë besim te skuadra e tij. Ai pranoi se sezoni ka qenë shumë i vështirë për Real Madrid, por këmbënguli se grupi duhet të qëndrojë i bashkuar në këtë moment delikat.
Trajneri konfirmoi gjithashtu se Tchouaméni do të jetë pjesë e skuadrës për El Clásico, pavarësisht konfliktit të fundit. Për Real Madrid, përballja ndaj Barcelona vjen në një moment vendimtar, ku tensionet jashtë fushe po marrin po aq vëmendje sa edhe vetë ndeshja.
