Situata rreth Kylian Mbappé ka krijuar diskutime te Real Madrid dhe mes tifozëve. Gjatë periudhës së dëmtimit, francezi udhëtoi për pushime në Itali dhe më pas mbërriti në Madrid vetëm 12 minuta para ndeshjes ndaj Espanyol, gjë që ka shtuar pakënaqësitë.
Në konferencën për shtyp, Arbeloa u përpoq të ulte tensionin, duke sqaruar se gjithçka që lidhet me lojtarët e dëmtuar monitorohet nga stafi mjekësor i klubit.
“Planifikimi për lojtarët e dëmtuar kontrollohet nga mjekët e Real Madrid. Ata vendosin kur lojtarët duhet ose nuk duhet të shkojnë në Valdebebas”, tha Arbeloa.
Megjithatë, trajneri shtoi se jashtë orarit të klubit, secili lojtar merr vetë vendimet e tij.
“Në kohën e lirë, secili bën atë që mendon se është më e mira. Unë nuk mund të ndërhyj në këtë pjesë”, u shpreh ai.
I pyetur nëse e kupton pakënaqësinë e tifozëve ndaj Mbappé, Arbeloa theksoi se nuk ka dyshime për përkushtimin e lojtarëve të tij, por dha edhe një mesazh të qartë për peshën e fanellës madrilene.
“Kur vesh fanellën e Real Madrid, e kupton kërkesën e këtij klubi. Ky është një klub ku nuk ka pasur kurrë, nuk ka dhe nuk do të ketë kurrë një lojtar më të madh se Real Madrid”, tha ai.
Arbeloa foli edhe për rëndësinë e sakrificës dhe punës në fushë, duke theksuar se talenti i vetëm nuk mjafton.
“Real Madrid nuk është ndërtuar me lojtarë që futen në fushë me smoking, por me lojtarë që dalin me fanellën plot djersë, baltë, sakrificë dhe këmbëngulje”, deklaroi ai.
Nga ana tjetër, Arbeloa ishte shumë i ngrohtë me Vinicius, i cili shkëlqeu ndaj Espanyol me dy gola.
“Ai është një lider natyral, një shok skuadre që të gjithë e duan dhe një person i shkëlqyer. Jam shumë krenar që e kam lojtar”, tha trajneri.
Sa i përket rikthimit të Mbappé për El Clásico, Arbeloa nuk dha një përgjigje të sigurt.
“Do të shohim si do të jetë këtë javë. Pas kontrolleve të fundit dukej se do të kërkonte pak më shumë kohë, por do të shohim si do të evoluojë”, përfundoi ai.
