Anthropic, kompania që qëndron pas inteligjencës artificiale Claude, ka shënuar një debutim historik në bursën Nasdaq, me aksionet që u hapën në 111.50 dollarë, 34% mbi çmimin fillestar të ofertës prej 83 dollarësh. Kompania arriti një vlerësim që kalon 2 trilionë dollarë, duke u renditur mes kompanive më të mëdha në botë dhe duke shënuar një nga daljet më të bujshme në tregjet financiare.
Oferta publike fillestare, IPO, mblodhi rreth 81 miliardë dollarë, ndërsa shitja e aksioneve dhe investimet private e çojnë vlerën totale të kapitalit të siguruar në mbi 107 miliardë dollarë. Interesi i jashtëzakonshëm i investitorëve vjen pavarësisht shqetësimeve për kostot e larta të zhvillimit të inteligjencës artificiale, shpenzimet masive për qendrat e të dhënave dhe pikëpyetjet mbi fitimprurjen afatgjatë të kompanive të këtij sektori.
Debutimi i Anthropic konsiderohet një test i rëndësishëm për gjithë industrinë e inteligjencës artificiale, në një kohë kur investitorët po përpiqen të kuptojnë nëse miliardat e hedhura në këtë teknologji do të sjellin fitime të qëndrueshme. Suksesi i saj në bursë mund të ndikojë edhe në planet e rivalit OpenAI, që raportohet se po shqyrton një dalje publike gjatë vitit të ardhshëm. Në këtë mënyrë, Anthropic mund të kthehet në një pikë referimi për vlerësimin e kompanive të inteligjencës artificiale.











