Dhimbja për ndarjen nga jeta të Jesús de Miguel ka prekur jo vetëm Tenerife-n, por edhe dhomën e zhveshjes së Andorrës, e cila mbetet thellësisht e tronditur nga ajo që ndodhi.
Futbollisti i Andorrës, Lautaro Spatz, ka reaguar me një mesazh emocional në rrjetet sociale, duke shprehur ngushëllimet për familjen e De Miguel dhe duke dalë në mbrojtje të portierit Jesús Owono, i përfshirë në përplasjen fatale gjatë ndeshjes.
“Ka momente kur futbolli humbet çdo kuptim. Momente që të shënojnë përgjithmonë dhe të bëjnë të kuptosh sa e brishtë është jeta. Ajo që përjetuam është diçka që askush prej nesh nuk do ta harrojë”, shkroi Spatz.
Ai theksoi se e gjithë skuadra e Andorrës është e shkatërruar emocionalisht nga tragjedia.
“E gjithë skuadra është e tronditur, e shkatërruar dhe thellësisht e prekur. Është një tragjedi që nuk e kishim imagjinuar kurrë se mund ta përjetonim në një fushë futbolli.”
Spatz u ndal veçanërisht te gjendja e Owono-s, i cili ka marrë edhe shumë kritika pas incidentit.
“Ata që e njohin e dinë çfarë njeriu është, sa shumë po vuan tani dhe se nuk do të kishte kurrë qëllim të lëndonte dikë.”
Ai shtoi se futbolli sjell edhe aksidente, por askush nuk mund të imagjinojë që një moment i tillë të përfundojë me pasoja kaq tragjike.
Owono kishte mbyllur më herët llogarinë e tij në Instagram pas valës së mesazheve që mori pas lajmit për ndarjen nga jeta të De Miguel.
Në fund, Spatz përsëriti solidaritetin e plotë të Andorrës me familjen dhe të afërmit e futbollistit të ndjerë.
“Dërgojmë ngushëllimet tona, respektin më të madh dhe gjithë forcën tonë për familjen dhe për të gjithë ata që po vuajnë nga kjo humbje e tmerrshme.”
