Kryetari i Grupit Parlamentar të Partisë Demokratike, Gazment Bardhi i është drejtuar zyrtarisht Presidentit Bajram Begaj ku i kërkon një reagim lidhur me pjesëmarrjen e trupit diplomatik në turin e diasporës.
Përmes një shkrese, demokrati bën me dije se këtë të hënë i është drejtuar zyrtarisht presidentit Begaj që të ndërhyjë për të mos lejuar cënimin e rëndë të barazisë së palëve në zgjedhje dhe parimeve themelore që garantojnë zgjedhjet e lira dhe të ndershme.
Sipas Bardhit mungesa e reagimit të presidentit perceptohet si një mesazh i qartë që ai mbështet këtë aktivitet të paligjshëm dhe “shkrirjen në një, shtetit dhe partisë në zgjedhje”.
“Sot i jam drejtuar zyrtarisht Presidentit që të ndërhyj për të mos lejuar cënimim e rëndë të barazisë së palëve në zgjedhje dhe parimeve themelore që garantojnë zgjedhjet e lira dhe të ndershme. Presidenti nuk duhet të hesht, por duhet të ngrihet në lartësinë e detyrës!
Heshtja dhe mungesa e reagimit të Presidentit për veprimin kriminal të mazhoranës qeverisëse dhe Trupit Diplomatik, perceptohet si mesazh i qartë që ai e mbështet këtë aktivitet të paligjshëm, dhe mbi të gjitha mbështet shkrirjen në një të shtetit dhe partisë në zgjedhje”, shkruan Bardhi.
Ndërkohë më tej ka bërë me dije se ditën e sotme ka depozituar pranë Prokurorisë së Posaçme kundër Korrupsionit dhe Krimit të Organizuar kërkesën për hetim ndaj Edi Ramës, Taulant Ballës, Igli Hasanit dhe ambasadorëve të cilët janë konstatuar duke marrë pjesë në takimet në diasporë të kryeministrit si dhe të ministrit.
“Po sot kam depozituar në SPAK edhe kërkesën për hetimin dhe ndjekjen penale ndaj Edi Ramës, Taulant Ballës, Igli Hasanit, dhe Ambasadorëve të konstatuar, për kryerjen e veprës penale të parashikuar në nenin 328/a të Kodit Penal”, shkruan ai ndër të tjera.
