Një 17-vjeçare nga Durrësi ka ndërruar jetë për shkak të meningitit bakterial, një sëmundje e rëndë dhe ngjitëse që prek membranat që mbështjellin trurin dhe palcën kurrizore.Vajza u paraqit në spitalin e Durrësit të shtunën, por për shkak të gjendjes së rënduar, u transferua menjëherë në QSUT në Tiranë. Pavarësisht përpjekjeve të stafit mjekësor, adoleshentja humbi jetën pasditen e së dielës.
Meningiti bakterial është një formë e rëndë e infeksionit që mund të përhapet përmes kontaktit të afërt me personin e infektuar. Për këtë arsye, familjarët e 17-vjeçares dhe stafi mjekësor që e ka trajtuar po trajtohen me profilaksi, një masë parandaluese për të shmangur infeksionin.
Janë duke u ndjekur me kujdes të gjitha kontaktet e afërta të vajzës, duke përfshirë edhe personelin që ka asistuar në trajtimin e saj. Këto masa janë thelbësore për të parandaluar përhapjen e mëtejshme të sëmundjes.
Çfarë është meningiti bakterial?
Meningiti bakterial është një inflamacion i rrezikshëm i membranave që mbulojnë trurin dhe palcën kurrizore. Shkaktohet nga baktere të ndryshme, si Neisseria meningitidis dhe Streptococcus pneumoniae. Simptomat e tij përfshijnë temperaturë të lartë, dhimbje koke të forta, ngurtësi të qafës, të përziera dhe në disa raste konfuzione apo krizë epileptike.
Sëmundja mund të jetë fatale nëse nuk trajtohet shpejt dhe në mënyrë agresive me antibiotikë. Për më tepër, ajo mund të përhapet përmes pështymës ose sekrecioneve respiratore, duke rritur rrezikun e infektimit te personat që kanë pasur kontakt të ngushtë me të prekurin.
