Gjimnasti italian, Lorenzo Bonicelli, ka pësuar një aksident të rëndë në Lojërat Botërore Verore Universitare FISU, të njohura edhe si Universiada Verore. Teksa po stërvitej për garën ekipore mbi unaza, 23-vjeçari është rrëzuar duke pësuar një dëmtim serioz në qafë.
Ende i vetëdijshëm, Bonicelli u transportua në Spitalin Universitar në Esen, ku po zhvillohet gara, dhe iu nënshtrua një operacioni në qafë për një thyerje të vertebrave të qafës. Ish-drejtori i Federatës Ndërkombëtare të Gjimnastikës (FIG), Steve Butcher, postoi në mediat sociale duke shpjeguar gjendjen e atletit. “Lorenzo është në një komë të induktuar nga mjekësia pas operacionit.
Do të duhen të paktën dhjetë ditë për të mësuar gjendjen e tij. E gjithë familja e gjimnastikës po lutet dhe po mbështet shërimin e tij të plotë!”. Në orët e mëvonshme erdhi një lehtësim, pasi nga Spitali Universitar i Esenit, me anë të njoftimi bëhej e ditur se gjimnasti nuk është në rrezik për jetën. “Për momentin, mund të konfirmojmë se pacienti është në kujdes intensiv. Jeta e tij nuk është në rrezik”, shpjegoi një zëdhënës i spitalit.
Për shkak të ndikimit emocional, Italia vendosi të tërheqë menjëherë ekipin e meshkujve, të përbërë nga Riçardo Villa dhe Niçolo Vannuçhi, duke demonstruar ngushëllimet e tyre për Bonicellin në këtë moment tragjik. “Duam t’i shprehim ngushëllimet tona familjes së Lorenzo Bonicellit dhe atij personalisht, duke shpresuar që gjithçka të shkojë mirë”, komentoi në rrjetet sociale trajneri i ekipit kombëtar Paolo Buçi, i cili aktualisht është në Festivalin Olimpik Rinor Evropian.
