Ajola Xoxa, bashkëshortja e kryebashkiakut të arrestuar të Tiranës, Erion Veliaj, është paraqitur sot në ambientet e Prokurorisë së Posaçme (SPAK).
Ajo po hetohet për veprat penale të korrupsionit pasiv, pastrimit të parave dhe fshehjes së pasurisë, ndërsa ndaj saj është caktuar masa e sigurisë “detyrim paraqitje”.
Ndërkohë, Erion Veliaj do të dalë sot para Gjykatës së Apelit të Posaçëm, ku do të shqyrtohet kërkesa e tij për lirim nga paraburgimi i Durrësit, ku ndodhet që prej 10 shkurtit. Seanca gjyqësore pritet të nisë në orën 14:00 dhe do të drejtohet nga gjyqtari Engert Pëllumbi.
Veliaj është nën hetim nga SPAK për korrupsion pasiv në nëntë raste të dyshuara, si dhe për pastrim parash. Ai është arrestuar me urdhër të Prokurorisë së Posaçme dhe ka paraqitur disa herë kërkesa për lirim, të cilat janë refuzuar deri më tani.
