Para fillimit të fushatës zgjedhore, Agjencia për Informim dhe Privatësi (AIP) ka bërë thirrje për kujdes në ruajtjen e të dhënave personale të qytetarëve nga partitë politike. Ajo thekson se përpunimi i këtyre të dhënave duhet të jetë në përputhje me ligjin dhe qytetarët duhet të kenë të drejtë të kundërshtojnë përdorimin e tyre për qëllime marketingu politik.
AIP kërkon që partitë politike të sigurojnë që çdo përpunim i të dhënave personale të jetë i bazuar në një arsye ligjore, siç është pëlqimi i qytetarëve, interesi legjitim i subjektit politik, ose arsye të tjera të përcaktuara me ligj. Një nga kërkesat kryesore është që të dhënat e kontakteve të qytetarëve, të mbledhura gjatë funksioneve publike ose për qëllime jo-politike, të mos përdoren për komunikim politik.
Partitë duhet të respektojnë të drejtën e qytetarëve për të kundërshtuar përpunimin e të dhënave të tyre dhe të ndalojnë menjëherë çdo komunikim nëse një qytetar shpreh dyshime. Gjithashtu, AIP i bën thirrje partive të shmangin profilizimin e votuesve për qëllime marketingu ose përpunimin masiv të të dhënave të ndjeshme, përveç se nëse ka një bazë të qartë ligjore dhe masat mbrojtëse janë në fuqi.
Përdorimi i teknologjive që mund të minojnë të drejtat e individëve kërkon një Vlerësim të Ndikimit mbi Mbrojtjen e të Dhënave (VNMDh), në përputhje me udhëzimet e AIP. Agjencia insiston gjithashtu për një transparencë të plotë ndaj qytetarëve, përfshirë qëllimet dhe metodat e përpunimit të të dhënave personale. Politikat e privatësisë duhet të jenë të qarta, të përditësuara dhe të qasshme gjatë gjithë periudhës zgjedhore, në mënyrë që qytetarët të jenë të informuar dhe të mbrojtur.
Këto kërkesa nga AIP synojnë të sigurojnë që fushata politike të jetë në përputhje me standardet e mbrojtjes së të dhënave dhe të drejtat e qytetarëve.
