Struktura e Posaçme Kundër Korrupsionit dhe Krimit të Organizuar (SPAK) po zhvillon një operacion në Elbasan, duke ekzekutuar disa urdhër-arreste të lëshuara nga Gjykata e Posaçme Kundër Korrupsionit dhe Krimit të Organizuar (GJKKO).
Mes personave për të cilët ka urdhër arresti janë ish-gjyqtarja Pajtime Fetahu dhe ish-gjyqtari Zihni Shahu. Ish-gjyqtarja Fetahu ishte duke vuajtur një masë sigurie “arrest në shtëpi” në kuadër të hetimit të SPAK për dosjen “Çopja”.
Kush është gjyqtarja Pajtime Fetahu?
Hetimet e SPAK për grupin kriminal “Çopja” zbuluan edhe lidhjet e bandës në sistemin e drejtësisë. Ish-gjyqtarja e Elbasanit Pajtime Fetahu akuzohet se mori ryshfet prej 11 mijë eurosh dhe një monedhë floriri.
Ajo kërkoi nga grupi kriminal t’i blihej edhe një celular. Krahas penetrimit në radhët e policisë, grupi kriminal “Çopja” kishte të besuarit e tij edhe në radhët e sistemit të drejtësisë.
Kush është Zihni Shahu?
Gjyqtari Zihni Shahu dha dorëheqjen rreth 7 muaj pas nisjes së procesit të vettingut, pasi ndaj tij kishte filluar hetimi administrativ dhe kërkoi të përjashtohej për 15 vjet nga e drejta për të punuar në sistemin e drejtësisë.
