Ylli i Real Madridit, Vinicius Junior, ka shpërndarë një mesazh prekës në rrjetet sociale që ka bërë bujë në mbarë botën. Futbollisti brazilian ka reflektuar publikisht mbi një periudhë personale të vështirë dhe ka kërkuar falje ndaj një gruaje të quajtur Virginia, të cilën e përshkruan si “një nënë të admirueshme dhe një partnere të jashtëzakonshme”.
Në postimin e tij në Instagram, Vinicius shkruan se ka kaluar momente që e kanë bërë të mendojë thellë për veten dhe marrëdhëniet që dëshiron të ndërtojë:
“Kohët e fundit përjetova një situatë që më bëri të shikoj brenda vetes dhe të pranoj sjellje që nuk përfaqësonin njeriun që dua të jem dhe marrëdhënien që dua të ndërtoj.”
Ai shtoi se mes tyre ekzistonte një lidhje e sinqertë, edhe pse nuk ishin çift zyrtarisht:
“Virginia është një grua e jashtëzakonshme, një nënë e admirueshme. Që kur u njohëm, ajo erdhi tre herë në Madrid për të më parë, duke lënë pas rutinën dhe jetën e saj vetëm për të qenë me mua. Gabova dhe e zhgënjeva, por e pranoj me sinqeritet.”
Me zemër të hapur, sulmuesi brazilian i kërkoi falje publikisht:
“Dua të kërkoj falje me gjithë zemër, sepse kuptova që një marrëdhënie e vërtetë ekziston vetëm kur ka respekt, besim dhe transparencë.”
Postimi përfundon me një mesazh plot reflektim:
“Tani dua ta filloj gjithçka nga e para. Pa gënjeshtra, pa zënka, pa maska. Me shumë dashuri, kujdes dhe respekt.” ❤️
Deklarata e Viniciusit ka marrë mijëra reagime në rrjet, me fansat që e vlerësojnë për ndershmërinë dhe guximin për të folur hapur për gabimet e tij personale.
