Policia e Tiranës ka goditur një grup të strukturuar kriminal, duke zbuluar një magazinë ku fshihej lëndë narkotike e gatshme për shitje në doza.
Gjatë operacionit, u sekuestruan 9 kilogramë kanabis, një sasi kokaine, 2 armë zjarri, 2 armë të ftohta, 2 automjete, 6 celularë dhe sende të tjera të kundërligjshme.
Në kuadër të këtij aksioni, u vunë në pranga 5 persona, të gjithë banues në Tiranë:
Xh. Z., 25 vjeç R. K., 21 vjeç E. Gj., 37 vjeç A. C., 22 vjeç A. K., 22 vjeçe
Operacioni u zhvillua nga specialistët e Komisariatit Nr. 4, mbi bazën e informacioneve të siguruara në rrugë operative. Në rrugën “Myslym Keta”, gjatë kontrollit në magazinën e shtetasit R. K., që kishte aktivitet në prodhimin e paletave të drurit, policia gjeti një valixhe me 9 kg kanabis dhe një armë zjarri.
Nga hetimet dyshohet se lënda narkotike ishte transportuar nga Sukthi drejt Tiranës nga shtetasi Xh. Z., në bashkëpunim me shtetasen A. K. Ndërkohë, në momentin e ndërhyrjes, në magazinë u gjetën edhe shtetasit A. C. dhe E. Gj., këtij të fundit iu sekuestrua një sasi kokaine gjatë kontrollit fizik.
Kontrolli në banesën e shtetasit Xh. Z. çoi në gjetjen e një arme tjetër zjarri dhe dy armëve të ftohta.
Hetimet vijojnë për identifikimin dhe kapjen e personave të tjerë të përfshirë në këtë aktivitet kriminal. Materialet iu referuan Prokurorisë për veprime të mëtejshme.
