Të dhënat e fundit nga Departamenti i Tregtisë i SHBA-së tregojnë se ekonomia e vendit ka pasur një zgjerim të befasishëm prej 3.8% në tremujorin e dytë të vitit, nga prilli deri në qershor. Kjo përfshin një rishikim të rëndësishëm të parashikimeve të mëparshme, që e vlerësonin rritjen në 3.3%.
Ekonomia amerikane është rikuperuar pas një rënieje prej 0.6% në tremujorin e parë, një fenomen i shkaktuar kryesisht nga luftërat tregtare të Presidentit Donald Trump.
Rënia në tremujorin e parë u atribuohej një rritjeje të madhe të importeve, pasi bizneset tentonin të sillnin mallra të huaja përpara vendosjes së tarifave nga Trump. Ndërsa në tremujorin e dytë, importet ranë me 29.3%, duke kontribuar ndjeshëm në rritjen ekonomike.
Shpenzimet konsumatore gjithashtu u rritën me 2.5%, duke u rikuperuar nga 0.6% që ishin në tremujorin e parë.
Pas rikthimit të tij në Shtëpinë e Bardhë, Trump ka ndryshuar politikën tregtare të SHBA-së, duke vendosur tarifa të larta mbi importet për të mbrojtur industrinë amerikane dhe për të inkurajuar kthimin e fabrikave në vend.
Megjithatë, ekonomistët e njohur paralajmërojnë se tarifat do të dëmtojnë ekonominë, duke rritur kostot dhe duke e bërë industrinë amerikane më pak efikase.
Këto tarifa paguhen nga importuesit amerikanë, të cilët përpiqen të kalojnë kostot mbi konsumatorët përmes çmimeve më të larta, çka do të thotë se ato mund të jenë inflacioniste.
Politika e papritur e tarifave nga Trump ka krijuar paqartësi në treg, duke kontribuar në një ngadalësim të punësimit. Në vitet e fundit, SHBA ka krijuar 400,000 vende pune në muaj, por këtë vit, rritja e vendeve të punës ka ngadalësuar ndjeshëm.
Sipas përllogaritjeve të fundit, ekonomia ka krijuar 911,000 vende pune më pak se sa ishte raportuar fillimisht. Pritjet për muajin nëntor sugjerojnë se numri i vendeve të punës do të jetë vetëm 43,000 për muajin shtator, megjithëse shkalla e papunësisë ka qëndruar në 4.3%.
Në një përpjekje për të mbështetur tregun e punës, Rezerva Federale ka ulur normën e interesit për herë të parë që nga dhjetori.
