Ish-anëtari i Shtabit të Përgjithshëm të UÇK-së, Xhavit Haliti, ka akuzuar publicistin Veton Surroi për përfaqësimin e keq të Ushtrisë Çlirimtare të Kosovës (UÇK) në takime të vitit 1998 me delegacionin e Kosovës në Shtetet e Bashkuara.
Haliti, në një intervistë për emisionin Frontal në T7, theksoi se Surroi dhe Fehmi Agani kishin shtyrë këtë ide gjatë një takimi me ish-presidentin Bill Clinton, duke i lënë përshtypjen se delegacioni kishte folur negativisht për UÇK-në.
Surroi është përgjigjur menjëherë duke e mohuar këtë akuzë, duke e karakterizuar si të pavërtetë. Ai pohon se delegacioni, përkundrazi, kishte kërkuar mbështetje amerikane për Kosovën dhe se nuk kishte ndodhur asnjë moment përgojimi të UÇK-së, as atëherë dhe as në ndonjë rast tjetër.
Ai shprehu habinë se këto pretendime po qarkullojnë pas 26 vjetësh dhe kërkoi më shumë respekt për ata që nuk janë më ndër ne.
Pas kësaj, Haliti ka publikuar një kabllogram që ai e ka cilësuar si dokument të bisedës mes Ibrahim Rugovës dhe Strobe Talbott, ushtrues i detyrës së Sekretarit të Shtetit.
Në kabllogram, Rugova citon se kishte kërkuar mbështetje nga SHBA dhe përmend grupet e frustruara në Kosovë, të cilat sipas tij, ishin përdorur si pretekste nga regjimi i Millosheviqit për të kryer masakra.
Surroi ka reaguar përsëri, duke thënë se dokumenti i publikuar nga Haliti nuk është stenogram nga takimi me Clinton, dhe se Rugova kishte kërkuar një rol aktiv të SHBA-ve për të parandaluar dhunën, duke përmendur ciklin e dhunës nga autoritetet serbe në përgjigje ndaj aksioneve të UÇK-së.
