Marash Kumbulla pritet të mungojë për rreth një muaj nga fushat e lojës. Sipas raportimeve të fundit nga Spanja, mbrojtësi shqiptar do të jetë sërish i gatshëm për Majorkën pas përfundimit të pushimit të kombëtareve.
25-vjeçari pësoi një dëmtim muskulor gjatë ndeshjes së 21 shtatorit kundër Atletiko Madrid, ku u detyrua të linte fushën në minutën e 36-të, duke ia lënë vendin Pablo Torres.
Majorka do të duhet të përballet pa shërbimet e Kumbullës në tri ndeshje të rëndësishme: ndaj Real Sociedad, Alaves dhe Atletik Bilbao. Nëse rikuperimi ecën sipas planit, ai pritet të rikthehet më 18 tetor, në sfidën kundër Sevijës.
Për shkak të këtij dëmtimi, Kumbulla nuk do të jetë në dispozicion të trajnerit Silvinjo për ndeshjet e tetorit. Kombëtarja shqiptare do të përballet me Serbinë në transfertë për kualifikueset e Botërorit 2026 dhe më pas do të luajë një miqësore ndaj Jordanisë.
