Kongresmeni republikan Brian Mast ka paraqitur një amendament në Kongresin e Shteteve të Bashkuara, duke e bërë anëtarësimin e Kosovës në NATO një prioritet të rëndësishëm të politikës amerikane në Ballkan.
Ky propozim, i mbështetur gjithashtu nga kolegu i tij, Keith Self, është cilësuar si një nga hapat më të rëndësishëm për rajonin që nga viti 2002, sipas organizatës “Albanians for America”.
Amendamenti përfshin disa pika kyçe si emërimin e ambasadorëve amerikanë në vende si Mali i Zi, Kosova dhe Bosnja e Hercegovina.
Ai gjithashtu rekomandon mbështetje për pavarësinë e Kosovës dhe integrimin e saj në NATO, si dhe një plan për përmirësimin e sigurisë energjetike në rajon. Ky plan përfshin zgjerimin e rrjetit të tubacioneve në Kroaci dhe zëvendësimin e burimeve energjetike ruse me alternativa të tjera.
Po ashtu, komenton implementimin e programit të Korporatës së Sfidës së Mijëvjeçarit (MCC) në Kosovë, me fokus në rritjen e sigurisë dhe zhvillimit ekonomik.
Mast ka propozuar gjithashtu që Shqipëria dhe Kosova të inkurajohen të ndajnë përpjekje për zhvillimin e industrisë së mbrojtjes dhe rritjen e shpenzimeve për mbrojtje, në përputhje me standardet e NATO-s.
Prania e forcave amerikane në Kosovë të konsiderohet një shtyllë e rëndësishme për sigurinë dhe stabilitetin në Ballkanin Perëndimor.
Një tjetër aspekt i këtij amendamenti është vazhdimi i implementimit të programit të Kontrollit të Eksporteve dhe Sigurisë Kufitare, për të parandaluar trafikun e armëve të paligjshme në kufirin me Serbinë.
Organizata “Albanians for America” e ka përshëndetur këtë nismë, duke e quajtur një moment historik për të gjitha zhvillimet në Ballkan.
Ajo thekson se ky amendament përfaqëson përpjekjet për të vendosur politika gjithëpërfshirëse për mbështetje ndaj Kosovës dhe stabilitetin rajonal.
Amendamenti aktualisht është në procesin e shqyrtimit në Kongres, dhe do të kërkojë miratimin nga Dhoma e Përfaqësuesve dhe Senati para se të bëhet pjesë e ligjit ose politikës zyrtare amerikane.
