Autoritetet në Nepal njoftuan se numri i viktimave nga trazirat e javës së kaluar ka arritur në 72, ndërsa ekipet e kërkimit vijojnë të gjejnë trupa në ndërtesa të djegura gjatë protestave masive kundër korrupsionit. Lajmi u bë i ditur të dielën nga Ministria e Shëndetësisë.
Ngjarjet u shënuan si shpërthimi më i rëndë i dhunës politike në Nepal prej dekadash. Protestat, ku morën pjesë kryesisht të rinj, nisën në kryeqytet dhe në qytete të tjera, duke çuar në dorëheqjen e kryeministrit KP Sharma Oli të martën.
Forcat e sigurisë përdorën gaz lotsjellës dhe plumba gome për të shpërndarë protestuesit, ndërsa këta të fundit dogjën ndërtesa shtetërore, përfshirë Gjykatën Supreme, parlamentin, poste policie, shtëpi të politikanëve dhe biznese private.
“Trupat e shumë njerëzve që vdiqën në qendrat tregtare, shtëpitë dhe ndërtesat e tjera të sulmuara po zbulohen tani”, tha zëdhënësi i Ministrisë së Shëndetësisë, Prakash Budathoki.
Numri i mëparshëm i të vdekurve ishte 51, ndërsa sipas të dhënave të fundit, mbi 2,100 persona janë plagosur gjatë përplasjeve.
Pas dorëheqjes së Olit, ish-kryetarja e Gjykatës së Lartë, Sushila Karki, mori detyrën si kryeministre e përkohshme, duke u bërë gruaja e parë në këtë post. Ajo ka marrë përsipër organizimin e zgjedhjeve të reja parlamentare të shpallura për 5 mars.
Karki deklaroi se qeveria do të japë kompensim prej 1 milion rupish (rreth 7,100 dollarë) për familjet e viktimave dhe trajtim falas për të plagosurit. Ajo theksoi se prioritet i ekzekutivit të përkohshëm do të jetë rindërtimi i strukturave të shkatërruara.
