Pas humbjes ndaj Zvicrës dhe valës së kritikave që pasoi, Kosova ka dhënë një përgjigje të fuqishme në fushën e lojës, duke mposhtur Suedinë me rezultatin 2-0 në stadiumin “Fadil Vokrri”. Një fitore me peshë jo vetëm për pikët, por edhe për moralin dhe atmosferën që rikthehet mes “Dardanëve”.
Skuadra e drejtuar nga trajneri Franko Foda zhvilloi një pjesë të parë të shkëlqyer, duke imponuar ritëm, disiplinë taktike dhe efikasitet në kundërsulme.
Goli i parë erdhi në minutën e 25-të, pas një aksioni të ndërtuar me kujdes. Dion Gallapeni shpërtheu në mesfushë dhe asistoi bukur për Elvis Rexhbecajn, i cili, pas dy tentativash, mposhti portierin suedez Robin Olsen dhe ndezi stadiumin.
Vetëm pak minuta më pas, Kosova goditi sërish. Kësaj here ishte kapiteni Vedat Muriqi që finalizoi një kundërsulm perfekt me një gol të klasit të lartë, duke dyfishuar avantazhin dhe siguruar një pjesë të parë të jashtëzakonshme për vendasit.
Në pjesën e dytë, Kosova administroi me maturi rezultatin, duke mos i lënë shumë hapësira suedezëve dhe duke kontrolluar ritmin e lojës deri në fund.
Me këtë triumf, Kosova jo vetëm që fiton tri pikë të rëndësishme në kuadër të kualifikueseve, por gjithashtu rikthen entuziazmin dhe besimin tek tifozët. Djemtë e trajnerit Foda treguan se janë të vendosur të luftojnë deri në fund për objektivat e tyre dhe se kanë karakter për të reaguar në momente të vështira.
