Dënim me vdekje për burrin që dogji të gjallë gruan për ngjyrën e lëkurës
Një gjykatë në qytetin Udaipur të Indisë ka dënuar me vdekje një burrë, i cili dogji të gjallë bashkëshorten e tij, Lakshmi, vetëm pse kishte lëkurë të errët.
Sipas vendimit gjyqësor, sulmi ndodhi natën e 24 qershorit 2017. Në dëshmitë e dhëna para se të ndërronte jetë, Lakshmi kishte treguar se burri i saj, Kishandas, e tallte shpesh duke e quajtur “kali” (e zezë) dhe e turpëronte për pamjen e saj që prej martesës në vitin 2016.
Në natën e krimit, ai i aplikoi në trup një lëng që pretendoi se ishte ilaç për zbardhjen e lëkurës. Kur ajo kundërshtoi, duke thënë se kishte erë acidi, ai e dogji me një shkop temjani dhe më pas i hodhi mbi trup pjesën tjetër të lëngut, duke e lënë të digjej.
Lakshmi u dërgua në spital nga familjarët e bashkëshortit, por nuk arriti t’i mbijetonte plagëve.
Gjyqtari Rahul Choudhary e cilësoi rastin si një nga “më të rrallët e të rrallëve” dhe theksoi se krimi ishte “një akt kundër njerëzimit”. Prokurori publik Dinesh Paliwal e quajti vendimin “historik”, duke shpresuar se do të shërbejë si mësim për shoqërinë.
Nga ana tjetër, avokati i Kishandas-it këmbënguli se klienti i tij është i pafajshëm dhe se vdekja e Lakshmit ka qenë aksidentale. Ai paralajmëroi se vendimi do të apelohet në gjykatën e lartë.
Ky rast ka rikthyer në qendër të vëmendjes problemin e thellë të të diskriminimit mbi bazën e ngjyrës së lëkurës në Indi, ku gratë me lëkurë të errët shpesh përballen me fyerje, refuzim martese dhe presion për të përdorur produkte zbardhuese që gjenerojnë miliarda dollarë fitime çdo vit.
Aktivistët thonë se, ndonëse vitet e fundit ka pasur fushata kundër këtij mentaliteti, paragjykimet e rrënjosura thellë vazhdojnë të shkatërrojnë jetë.
