Më 31 gusht, një 32-vjeçar me shtetësi suedeze u sulmua në Manastir, Maqedoni e Veriut, kur disa të rinj tentuan t’i hiqnin me forcë bluzën që kishte veshur. Sipas denoncimit të bërë në polici, bluza kishte simbole që dyshohet se lidhen me Shqipërinë, gjë që mund të ketë qenë arsyeja e këtij sulmi.
Gazetari Naser Pajaziti, nga Maqedonia e Veriut, denoncon aktin e dhunës si një shkelje të rëndë ndaj një qytetari të pafajshëm, duke theksuar se grupi i tifozëve “Çkembari” jo vetëm që përdori dhunën, por ndjek edhe një linjë të rrezikshme me deklaratat e tyre, duke ofenduar flamurin kombëtar shqiptar dhe nxitur urrejtje ndër etnike. Pajaziti thekson se ky veprim kalon në kufijtë e huliganizmit dhe provokimit, që dëmton paqen dhe bashkëjetesën në vend. Sipas tij, flamuri shqiptar është simbol i një kombi dhe askush nuk ka të drejtë ta diskriminojë atë.
Për gazetarin, është e domosdoshme që organet përkatëse të veprojnë menjëherë. Ai kërkon që Prokuroria të fillojë procedura për nxitje të urrejtjes dhe që Ministria e Punëve të Brendshme të identifikojë autorët e sulmit. Po ashtu, ai i bën thirrje Komisionit për Marrëdhënie Ndëretnike të marrë një qëndrim publik të qartë mbi këtë incident.
Pajaziti thekson se heshtja përbën bashkëfajësi, dhe paralajmëron se nëse nuk ka llogaridhënie, huliganizmi do të vazhdojë të rritet dhe dhuna do të përsëritet. Ai përfundon me një deklaratë të fortë se flamuri është i shenjtë dhe kushdo që e ofendon duhet të përballet me drejtësinë.
Ky incident shënon një situatë tejet shqetësuese për bashkëjetesën ndëretnike në Maqedoninë e Veriut dhe ngre pyetje serioze mbi tolerancën dhe respektin ndaj simboleve kombëtare.
