Klubet e Premier League kanë arritur një rekord të ri historic në shpenzimet e merkatos së verës, duke kaluar për herë të parë shifrën prej 3 miliardë paundësh. Ky shifër do ta kalojë rekordin e mëparshëm prej 2.4 miliardë paundësh të vitit 2023, sipas të dhënave të Transfermarkt.
Liverpool vendosi një rekord kombëtar me blerjen e Alexander Isak për 125 milionë paund, duke e ndjekur me blerjen e Florian Wirtz për 100 milionë paund, që me bonuset mund të arrijë deri në 116 milionë paund. Këto dy lëvizje vetëm nga Liverpool e çuan totalin e shpenzimeve të klubit në rreth 400 milionë paund.
Për këtë rritje të madhe, The Times përmend një “stuhi perfekte” faktorësh që kanë përmirësuar ndjeshëm fuqinë financiare të klubeve angleze. Një nga arsyet kryesore është garancia nga të ardhurat televizive, e cila përfshin një marrëveshje të re vendase për katër vitet e ardhshme që siguron stabilitet financiar. Po ashtu, dominimi i klubeve angleze në Europë si dhe pjesëmarrja e gjashtë klubeve në Champions League kontribuojnë me të ardhura prej 50-100 milionë paund për secilin klub. Fitimet nga Club World Cup gjithashtu kanë qenë të rëndësishme, me Manchester City dhe Chelsea duke marrë respektivisht 40 dhe 80 milionë paund.
Marrëveshjet komerciale të mëdha, si kontrata e City me Puma dhe ajo e Liverpool me Adidas, kanë ndihmuar në rritjen e financave. Për më tepër, kufizimet më të pakta nga rregullat e PSR krahasuar me vitin e kaluar, ku shumë klube përballeshin me penalizime, kanë lejuar një ambient më të favorshëm për investime.
Kieran Maguire, ekspert i financave të futbollit në Universitetin e Liverpoolit, thekson se një pjesë e madhe e shpenzimeve është bërë mes vetë klubeve angleze, duke krijuar një efekt zinxhir në merkato. Liverpool gjithashtu ka fituar të ardhura të konsiderueshme nga shitjet e Luis Diaz dhe Darwin Nunez, gjë që i ka lejuar të investojnë agresivisht pa rrezikuar penalitete financiare.
