Një varr monumental është zbuluar në fshatin Strikça të Bulqizës, në një vend të quajtur “Fusha e Gurrës”. Ky varr, i datuar në periudhën romake të shekujve III-IV, u zbulua nga një grup arkeologësh gjatë një projekti kërkimor të drejtuar nga Akad. Adem Bonguri dhe Msc. Erikson Nikolli.
Strukturat e varrit kanë përmasa të mëdha, rreth 9 metra në 6 metra dhe një lartësi prej 2.40 metrash për dhomën funerale.
Arkeologu Erikson Nikolli theksoi se ky monument është i veçantë nga ana arkitektonike dhe përmban të dhëna arkeologjike dhe epigrafike të rëndësishme. Një mbishkrim romak bilingual, i cili është i pari i këtij lloji që është zbuluar në zonën e Dibrës, i kushtohet individit të varrosur, i quajtur Gelliano, si dhe ka një dedikim për perëndinë romake Jupiter.
Megjithëse varri ka pësuar grabitje që në periudhën antike, ai ende përmban pjesë të inventarit, përfshirë enë qelqi të ndryshme, një krehër kocke, thika, dhe një sasi të madhe tekstili të thurur me fije ari, me të cilin individi është varrosur. Strukturat e varrit janë të ndara në tre ambiente: dhoma e varrimit, paradhoma, dhe shkallarja monumentale. Muret e shkallares janë me motive gjeometrike në stuko që ruhen ende.
Përveç pjesës nëntokësore, janë evidentuar edhe struktura muresh në pjesën e sipërme të varrit, duke sugjeruar se mund të ketë qenë një mausoleum. Zbulime të tjera përfshijnë një mbishkrim funerar në afërsi që do të analizohet më tej. Materialet e ndërtimit përbëhen kryesisht nga gurë të mëdhenj të punuar, të marrë nga gurore të largëta.
Ky monument unik është datuar më shumë përmes inventarit, teknologjisë së ndërtimit, dhe të dhënave epigrafike, duke e vendosur atë në shekujt III-IV e.s. Zbulimet e ardhshme pritet të ofrojnë informacione të reja që do të pasurojnë hartën arkeologjike të territorit shqiptar.
