Një operacion i gjerë i Prokurorisë së Fierit dhe Policisë së Shtetit, zhvilluar këtë të mërkurë, ka çuar në arrestimin e disa personave të përfshirë në një skemë të dyshuar evazioni fiskal dhe pastrimi parash që lidhet me aktivitetin e kompanisë Bankers Petroleum në zonën naftëmbajtëse të Patos-Marinzës.
Mes të ndaluarve është edhe Ardit Kero, ish-drejtor i financës në Bankers dhe ish-bashkëshorti i moderatores së njohur Arbana Osmani. Ai dyshohet si një nga figurat kyçe në zbatimin e skemave të manipulimit financiar dhe devijimit të fondeve.
Në kuadër të hetimeve janë arrestuar edhe disa drejtues të huaj të kompanisë, përfshirë Hongping Xiao, shtetas kinez dhe administrator aktual i Bankers Petroleum, si dhe ish-drejtues të tjerë me kombësi kineze dhe kanadeze.
Sipas të dhënave paraprake, skema përfshinte përdorimin e faturave fiktive, fryrjen e investimeve dhe shmangien e detyrimeve tatimore, duke shkaktuar një dëm ekonomik që kap vlerën e dhjetëra milionë eurove. Paratë e devijuara dyshohet se janë përdorur për blerje pasurish luksoze dhe transaksione të tjera brenda dhe jashtë Shqipërisë.
Gjurmimi i pronarëve përfitues është vështirësuar nga fakti që kompanitë mëmë të Bankers janë të regjistruara në juridiksione offshore si Ishujt Cayman dhe Hong Kong, në kundërshtim me legjislacionin shqiptar për transparencën e pronësisë.
Kujtojmë se Gjykata e Lartë ka konfirmuar më herët një gjobë prej 80 milionë euro ndaj kompanisë, ndërkohë që detyrimet totale financiare të saj arrijnë në 100 milionë euro. Zbatimi i kësaj mase është vonuar për shkak të ndërhyrjeve të dyshuara në nivele të ndryshme institucionale.
Sipas portalit “Prapaskena”, zhvillimet pritet të ngjallin debat të fortë mbi përgjegjësinë institucionale për një nga skandalet më të mëdha ekonomike të viteve të fundit në vend.
