Në një kohë kur inflacioni dhe çmimet e larta të produkteve bazë vijojnë të rëndojnë xhepat e qytetarëve, një tjetër tregues ekonomik flet për një realitet paralel: shqiptarët po shpenzojnë gjithnjë e më shumë për produkte luksoze, veçanërisht për orë dore të markave të njohura botërore.
Sipas të dhënave të publikuara nga INSTAT, vetëm gjatë pesë muajve të parë të vitit 2025 janë importuar rreth 325 milionë lekë në orë dore, që përkthehet në afërsisht 3.25 milionë euro. Kjo shënon një rritje prej 27% krahasuar me të njëjtën periudhë të një viti më parë.
Megjithatë, rritja nuk ka ardhur nga një sasi më e madhe orësh të importuara. Përkundrazi, në janar–maj të këtij viti janë importuar 34 ton orë, ndërsa në të njëjtën periudhë të vitit 2024 kjo sasi ishte 44 ton. Kjo nënkupton se tregu shqiptar po zhvendoset drejt orëve më të shtrenjta dhe cilësore, duke lënë pas produktet më ekonomike apo imitimet.
Tendenca tregon se ora dore nuk është më thjesht një aksesor funksional për të matur kohën, por është kthyer në një simbol statusi dhe suksesi për një pjesë të konsumatorëve shqiptarë. Ashtu si me automjetet luksoze, edhe ky aksesori i vogël në dorë po bëhet gjithnjë e më shumë një tregues i standardit të jetesës dhe stilit të jetës.
