Një deklaratë befasuese është publikuar vetëm pak minuta më parë nga presidenti amerikan Donald J. Trump në rrjetin e tij social Truth Social, ku ai pohon se Izraeli dhe Irani kanë arritur një marrëveshje për armëpushim të plotë dhe të përgjithshëm. Sipas Trump, kjo marrëveshje pritet të hyjë në fuqi pas përfundimit të operacioneve të fundit në terren, brenda rreth gjashtë orësh.
Trump sqaron se Irani do të jetë i pari që do të ndalojë zjarrin për një periudhë 12-orëshe, pasuar nga një armëpushim i ngjashëm nga ana izraelite. Nëse gjithçka ecën sipas planit, pas 24 orësh konflikti i njohur tashmë si “Lufta 12-Ditore” do të përfundojë zyrtarisht.
“Ndihem i nderuar të përgëzoj të dy vendet, Izraelin dhe Iranin, për vendosmërinë, guximin dhe mençurinë që treguan për t’i dhënë fund një lufte që mund të kishte zgjatur për vite dhe shkatërruar gjithë Lindjen e Mesme,” shkruan Trump në postimin e tij.
Ai shton gjithashtu se gjatë periudhës së armëpushimit, të dyja palët do të qëndrojnë paqësore dhe do të respektojnë marrëveshjen, ndërsa nëse gjithçka shkon siç pritet, përfundimi i këtij konflikti do të përshëndetet nga e gjithë bota.
Megjithatë, deri në këtë moment, nuk ka ende asnjë konfirmim zyrtar nga autoritetet izraelite apo iraniane, dhe as nga ndonjë institucion ndërkombëtar si Kombet e Bashkuara apo administrata amerikane.
Në rast se ky lajm do të konfirmohet nga palët përkatëse, ai do të përbënte një moment historik në drejtim të stabilizimit të Lindjes së Mesme, një rajon i tronditur prej dekadash nga konfliktet e përgjakshme.
