Ramazan Dedja është një i moshuar 85-vjeçar që tregon për emisionin “Stop” se ka mbyllur rreth 12 milionë lekë në bankë me ish-bashkëshorten para shumë viteve, në mënyrë që kur njëri të ndahej nga jeta, tjetri t’i merrte pa shumë andralla.
Por kur ka shkuar në bankë nuk i ka gjetur më paratë. Ramazani thotë se është ndarë para tre vjetësh me gruan 75-vjeçare për imoralitet.
“Stop” komunikon me ish-bashkëshorten, Bukurien, e cila pranon se i ka marrë ajo paratë pasi me 10 milionë lekë, ka çuar vajzën në Itali. Bukuria thotë se ish-bashkëshorti i ka harxhuar paratë me gra të tjera në kurriz të saj dhe ekonomisë së shtëpisë. Madje, sipas së moshuarës, këtë mund ta provojnë edhe tabulatet telefonike.
Bukurie: Po, po, po! Lekët unë i kam marrë. Dëgjo deri në fund e ta dish mirë ti! Gocës së vogël i kam dhënë 10 milionë që e kam çuar në Itali. Kapeni gocën, pyeteni, nëse nuk është kështu! Nëse unë gënjej, i fal edhe shtëpitë. E para, e dyta, lekët, që kishte në xhep, që i mbante fshehtas, këtej m’i jepte e këtej m’i vidhte, filluan t’ia hanë të tjerët, personale të tij 8 milionë.
Gazetari: Kishe të drejtë t’i tërhiqje vetëm ti apo kush të ishte që…
Bukurie: Kur i kaluan thesarin e bankës…,ai nuk merr vesh nga dokumentat se është… Të thotë çfarë të dojë se lekët i ka marrë goca!
Gazetari: Kur të ndahet njëri nga jeta, kushti…
Bukurie: Le të jetë çfarë të dojë kushti, nuk merr lekë ai po nuk pruri lekët që ka vjedhur në shtëpi. Harroje këtë! E di shumë mirë ai. Sa herë të ka kapur gruaja me lekë në dorë, thuaji! Ai nuk mban mend se ai është mashtrues dhe kur i kam thënë hajde se do i kalojmë në thesarin e bankës, bëj çfarë të duash, nuk kam punë me lekët e tua, më ka thënë. Lekët ia hëngrën të tjerët pjesë-pjesë. T’i ka ngrënë një grua, thuaj? Ka vdekur, tre milionë t’i hëngri ajo që kur ti ishe i pandarë me gruan. Hapni tabulatet e telefonit, bëja të qartë këtë se është budalla, nuk kupton asnjë gjë nga këto, është dru me pre, kur i thonë.
