Ujësjellës Kanalizime Rajoni Vlorë ka informuar qytetarët dhe bizneset se furnizimi me ujë të pijshëm është ndërprerë për shkak të stakimeve të energjisë elektrike në zonat ku ndodhen stacionet kryesore të ujësjellësit, si dhe për shkak të një avarie të rëndësishme në njërin prej tyre. Kjo situatë ndodh në një moment kur sezoni turistik ka nisur, duke shtuar shqetësimet për furnizimin me shërbime bazë.
Sipas njoftimit zyrtar, gjatë ditës së djeshme janë regjistruar ndërprerje të energjisë që kanë shkaktuar probleme në procesin e pompimit dhe shpërndarjes së ujit në qytetin e Vlorës. Gjendja është përkeqësuar gjatë mesnatës, kur Stacioni Nr. 4 një nga më të rëndësishmit në rrjetin e furnizimit, ka dalë jashtë funksioni për shkak të një defekti teknik.
Si pasojë, një pjesë e madhe e qytetit ka mbetur pa ujë gjatë orëve të para të mëngjesit të sotëm. Autoritetet kanë bërë me dije se situata do të vazhdojë të shoqërohet me ndërprerje të pjesshme gjatë ditës, për të lejuar furnizimin e depozitave dhe stabilizimin e rrjetit.
Ujësjellësi i Vlorës siguron se ekipet teknike janë në terren dhe po punojnë me intensitet për të realizuar ndërhyrjet e nevojshme, në mënyrë që furnizimi me ujë të rikthehet sa më shpejt në normalitet. Qytetarëve u kërkohet mirëkuptim deri në përfundimin e plotë të punimeve.
Ndërkohë, vetëm tre ditë më parë qyteti u përball edhe me një tjetër problem serioz: djegia e mbeturinave që mbushi zonën me tym të dendur, pa asnjë reagim nga autoritetet lokale apo ato qendrore.
