Zona përreth Deltës së Ishmit është pushtuar nga tonelata me mbetje plastike dhe spitalore, duke krijuar një situatë alarmante mjedisore. Asnjë institucion shtetëror, lokal apo qendror, nuk ka ndërhyrë për pastrimin apo menaxhimin e kësaj ndotje.
Për më tepër, impianti i pastrimit të lumit Ishëm nuk funksionon, ndonëse ishte ndërtuar pikërisht për të ndalur derdhjen e mbetjeve në det. Lumi Ishëm, i gjatë 74 km, rrjedh përmes Shqipërisë Qendrore dhe përfundon në Adriatik, pranë Kepit të Rodonit.
Fiks Fare, raportoi sot se e gjithë zona është shndërruar në një landfill të hapur, ku përveç mbetjeve plastike janë gjetur edhe mbetje spitalore. Pamjet filmike tregojnë një ndotje masive në të dy krahët e Deltës, që administrohen nga bashkitë Kurbin dhe Durrës, pa asnjë ndërhyrje konkrete për pastrimin e saj.
