Shkencëtarët e Institutit Terasaki për Inovacion Biomjekësor në Kaliforni kanë krijuar një lloj të ri lëkure elektronike që mund të shërohet vetë.
Lëkura është prodhuar duke përdorur një polimer të përkulshëm ‘të qëndisur’ me fije të holla argjendi dhe lidhje disulfiti. Ky kombinim bën që materiali të vetëriparojë prerjet, çarjet dhe thyerjet në temperaturë ambienti, pa nevojën e një burimi nxehtësie apo drite.
Kur kombinohet me pajisje që mund të vendosen në trup, lëkura elektronike mund të hartojë biosinjalet si lëvizja duke shfaqur potencial për aplikime në mjekësi, por edhe konsumatore.
“Kjo është një teknologjiqë ndryshon plotësisht atë që është e mundur për pajisjet inteligjente”, thotë profesori Yangzhi Zhu. “Duke shkurtruar kohën e riparimit në 1 minutë, ne kemi kapërcyer një nga pengesat më të mëdha drejt përdorimit praktik e të përditshëm të lëkurës elektronike”.
Gjatë testeve, lëkura rezistoi gjatë 50 cikleve të prerjeve dhe shërimit si dhe 50.000 cikleve të përkuljes me humbje të papërfshillshme performance. Ajo vazhdoi të funksiononte edhe duke u ekspozuar në një spektër të gjerë temperaturash dhe lagështie, madje edhe në ujë.
Duke u vendosur në një pajisje inteligjente, lëkura mund të regjistronte të dhënat e aktivitetit muskular gjatë ushtrimeve fizike. Më pas, shkencëtarët përdorën një model të Inteligjencës Artificiale për të klasifikuar lodhjen e muskujve duke arritur një shkallë saktësie prej 95%.
Lëkura elektronike po konsiderohet për përdorime në sporte si vëzhgimi i performancës, sistemet e kontrollit të gjymtyrëve artificialë dhe kujdesi shëndetësor inteligjent. Gjithashtu shkencëtarët po shohin sesi mund të rrisin prodhimin duke përdorur materiale përçuese alternative dhe teknika të përparuara printimi
