SHKODËR– Kur na ndajnë vetëm 3 ditë nga zgjedhjet e përgjithshme parlamentare të 11 Majit, agjentët e BKH me mbështetjen e bluve ndërmorën një operacion në qytetin e Shkodrës për krimet zgjedhore. Policia e Shkodrës doli me një deklaratë zyrtare ku dha detajet e operacionit.
Me urdhër të GJKKO-së u zbatuan vendimet për kontrollin personal dhe të automjeteve ndaj 6 personave, që sipas mediave janë pjesë e subjekteve politike në Shkodër, përfshirë PSD e Tom Doshit. Blutë e Shkodrës informojnë se kanë kontrolluar 9 automjete, njëri prej tyre në pronësi të OSHEE-së, por në përdorim nga një prej personave për të cilin ishte lëshuar urdhri i kontrollit. Operacioni u quajt ‘Premtimi’ dhe hetimet për këtë çështje po vijojnë.
Ky operacion, përkoi edhe me një vizitë të kreut të SPAK, Altin Dumani në Shkodër, i shoqëruar edhe nga prokurorë të tjerë, pjesë e Task-Forcës për krimet zgjedhore. Kreu i SPAK kërkoi nga drejtuesi i prokurorisë së rrethit por edhe drejtori i policisë, të vlerësohet çdo informacion për krime zgjedhore dhe në rastet kur ka akuza apo deklarata publike, denoncuesit të thirren për të bërë kallëzim. Pas Shkodrës, kreu i SPAK u ndal në Lezhë, aty ku situata politike ka qenë mjaft e tensionuar javët e fundit.
Njoftimi i plote
Punë intensive në bashkëpunim me SPAK, për parandalimin dhe goditjen e krimeve në fushën e zgjedhjeve. U zhvillua në qarkun Shkodër, faza e parë e operacionit policor të koduar “Premtimi”. Në bashkëpunim me BKH, u zbatuan vendimet për kontrollin personal dhe të automjeteve ndaj 6 shtetasve.
Sekuestrohen celularë, para dhe lista me emra qytetarësh që u gjetën këtyre shtetasve. Drejtoria për Hetimin e Krimeve Ekonomike dhe Finaciare, në bashkëpunim me Byronë Kombëtare të Hetimit, Drejtorinë e Forcës së Posaçme Operacionale dhe Drejtorinë Vendore të Policisë Shkodër, në vijim të punës intensive të bërë në të gjithë vendin, për parandalimin dhe goditjen e krimeve elektorale, zhvilluan sot, në qarkun Shkodër, fazën e parë të operacionit policor kundër krimeve zgjedhore, të koduar “Premtimi“.
Në kuadër të kësaj faze u bë ekzekutimi i vendimit të datës 07.05.2025, të Gjykatës së Posaçme Kundër Korrupsionit dhe Krimit të Organizuar, për kontrollin fizik ndaj 6 shtetasve dhe 9 automjeteve të tyre, konkretisht ndaj shtetasve F. V., B. L., D. D., S. Z., B. H. dhe Z. D., banues në Shkodër, Bushat dhe Vau i Dejës;
-automjetit në pronësi të shtetasit F. V.;
-automjetit në pronësi të shtetasit B. P.;
-automjetit në pronësi të shtetasit D. D.;
-automjetit në pronësi të OSHEE-së, në përdorim nga shtetasi S. Z.;
-2 automjeteve në pronësi të shtetasit B. H.;
-3 automjeteve në pronësi të shtetasit Z. D.
Nga kontrollet e kryera në kuadër të këtij operacioni u sekuestruan 7 celularë, dokumente të ndryshme, një shumë parash (euro dhe lekë) dhe tollona karburanti. Hetimet në kuadër të këtij operacioni vijojnë.
