Pas shpalljes tre ditore të armëpushimit nga Rusia, vjen reagimi i parë i presidentit Ukrainas, Volodymyr Zelensky. Mediat e huaja raportojnë se Zelensky e konsideron si një përpjekje të re manipulimi nga ana e Vladimir Putin.
Vladimir Putin njoftoi ditën e djeshme, në mënyrë të njëanshme një armëpushim tre-ditor për muajin e ardhshëm gjatë përvjetorit të Luftës së Dytë Botërore. Presidenti Zelensky e ka konsideruar përpjekjen 3-ditore për armëpushim si një përpjekje e re për manipulim.
“Tani ka një përpjekje të re për manipulim. Për ndonjë arsye, të gjithë duhet të presin 8 majin dhe vetëm atëherë të kenë një armëpushim për të siguruar qetësi për Putinin gjatë paradës. Ne i vlerësojmë jetët e njerëzve dhe jo paradat. Ne themi se bota beson se nuk ka arsye për të pritur 8 majin. Dhe armëpushimi nuk duhet të jetë vetëm për disa ditë për të rifilluar vrasjet më pas”, u shpreh Zelensky.
Zyrtarët ukrainas theksuan gjithashtu se Rusia njoftoi një armëpushim të ngjashëm gjatë periudhës së Pashkëve vetëm për ta shkelur atë. Presidenti rus sugjeroi armëpushimin në maj për të shënuar 80-vjetorin e fitores së Bashkimit Sovjetik në Luftën e Dytë Botërore dhe tha se Kievi duhet të ndjekë shembullin e Moskës.
