SARANDË – Në një takim me qytetarë të Sarandës dhe rrethinave, kreu i Partisë Demokratike Sali Berisha ngriti alarmin për gjendjen ekonomike të pensionistëve shqiptarë, të cilët sipas tij po jetojnë në varfëri ekstreme për shkak të keqqeverisjes dhe vjedhjes së vazhdueshme të pasurisë publike.
Duke përshëndetur qytetarët e Sarandës, Konispolit dhe të gjithë qarkut, Berisha vlerësoi trashëgiminë kulturore dhe harmoninë ndërfetare dhe ndëretnike të zonës, të cilën e cilësoi si një “universitet të lirive dhe të drejtave njerëzore”.
“Saranda ka madhështinë e njerëzve të vet. Këtu bashkëjetojnë në paqe shqiptarë, grekë, rumunë – është një model për gjithë Shqipërinë,” tha Berisha.
Por sipas tij, kjo madhështi është në kontrast të thellë me realitetin ekonomik të qytetarëve të kësaj treve. Ai tha se pensionistët po përballen me skamjen, të lënë në mëshirën e një pensioni “qesharak dhe të pamerituar”, që nuk mjafton as për ilaçet bazë.
“Sot, 57% e pensionistëve marrin më pak se 172 mijë lekë në muaj. Me këtë shumë, shumë prej tyre nuk arrijnë të blejnë as ilaçet e nevojshme. Nuk jetojnë, mbijetojnë”, theksoi ai.
Duke e krahasuar situatën me vendet fqinje, Berisha tha se ndërkohë që pensionet në Mal të Zi, Maqedoni të Veriut dhe Serbi janë rritur ndjeshëm që prej vitit 2013, në Shqipëri ato kanë mbetur në nivele të papërballueshme për jetesë.
“Këta qytetarë nuk janë dembelë, janë të vjedhur. Ndryshe nga vendet e tjera që përparuan, Shqipëria nuk pati luftë – pati vjedhje. Prandaj nuk kemi pensione të denja sot,” deklaroi Berisha.
Në fund të fjalës së tij, ai bëri thirrje për reflektim dhe ndryshim politik, duke e quajtur këtë gjendje “tiraninë e mjerimit”, një term që sipas tij përshkruan më së miri realitetin aktual të shumë shqiptarëve.
