Kosova dhe Maqedonia e Veriut kanë përuruar sot pikëkalimin e përbashkët kufitar Han i Elezit – Bllacë, në përpjekje për ta lehtësuar lëvizjen e udhëtarëve mes dy vendeve fqinje, duke hequr kontrollin dhe ndalesën e dyfishtë.
Pika kufitare në Bllacë është përballur me radhë të gjata në të dy anët, për shkak të kontrolleve.
Por, nga tani, për udhëtarët nga Kosova në Maqedoninë e Veriut dhe anasjelltas do të ketë vetëm një ndalesë.
Në një fjalim rasti gjatë ceremonisë së përurimit, kryeministri Kurti e ka vlerësuar projektin si të një rëndësie të veçantë për të dyja shtetet.
“Janë më shumë sesa infrastrukturë kufitare. Janë pika të reja bashkëpunimi dhe shërbimi që lidhin edhe më shumë dy shtetet tona dhe forcojnë edhe më tej fqinjësinë tonë të mirë. Tani e tutje qytetarët do të kontrollohen vetëm në hyrje të shtetit pritës, ndërkaq të dhënat do të shkëmbehen në kohë reale përmes një sistemi të përbashkët teknologjik”, tha Kurti.
Ndërkohë, kryeministri i Maqedonisë së Veriut, Hristijan Mickoski, tha se kjo pikë kufitare, e cila më parë është parë si pengesë, tashmë do të jetë lehtësim dhe do të nxisë një bashkëpunim më të fuqishëm mes dy vendeve.
“Një vendim i duhur për lehtësimin e lëvizjes së qytetarëve tanë ndërmjet dy vendeve, një lehtësim për ekonominë e dy vendeve. Tashmë kemi një pikë ndalese, një pikë kontrolli, si dëshmi që kufiri nuk duhet të jetë mur, por duhet të jetë urë bashkëpunimi mes vendeve. Një urë prej të cilës presim të kalojnë me miliona njerëz brenda vitit”, u shpreh Hristijan Mickoski.
Kosova ka tri pika zyrtare kufitare me Maqedoninë e Veriut, ndërsa kontrolli i përbashkët kufitar do të vlejë në dy prej tyre, përfshirë edhe atë Glloboqicë – Jazhincë. Ministritë e Brendshme të të dy vendeve arritën marrëveshje vitin e kaluar për kontrolle të përbashkëta kufitare.
