I shpallur në kërkim që prej Majit të vitit 2024 në kuadër të operacionit “Revanshi”, policia ka arrestuar ish efektivi i RENEA Altin Morina.
Nga informacionet e para mësohet se Morina është arrestuar gjatë orëve të vona të mbrëmjes, ku dyshohet se me vete kishte një pistoletë, ndërsa në momentin e arrestimit bashkë me të ka qenë edhe një person tjetër.
Altin Morina u shpall në kërkim në 17 maj të 2024 në kuadër të operacionit Revanshi
Ai akuzohet se ka bashkëpunuar me Durim Bamin për të organizuar kultivimin e bimëve narkotike në zonën e Niklës dhe Tapizës në vitet 2019-2020.
Ish efekti i RENEA ka qenë arrestuar edhe më herët, në mars të vitit 2023, pasi në makinën me të cilën po lëvizte iu gjetën 113 mijë euro.
43-vjeçari, me detyrë Shef i Repartit të Stërvitjes tek Forcat RENEA, u prangos në zonën e Kodrës së Diellit, teksa lëvizte me këtë automjet luksoz. Shuma e konsiderueshme u gjet poshtë sediljes së parë e mbështjellë me një qese plasmasi.
Por një muaj më vonë, ai u lirua nga qelia pasi deklaroi se shumën e parave e kishte marrë hua te një biznesmen për një problem personal dhe se ato nuk ishin të krijuara nga aktiviteti kriminal.
“Në dinamikën e hetimit të këtij procedimi penal, janë grumbulluar prova që krijojnë dyshimin e arsyeshëm se shtetasi Durim Bami., në bashkëpunim me shtetasin Altin Morina (me detyrë efektiv i forcave “Renea” në kohën e kryerjes së krimit) kanë organizuar kultivimin e bimëve narkotike në zonën e Niklës dhe Tapizës”, – thuhet në dosjen e SPAK.
