Derbi i Londrës së Veriut mes Arsenal dhe Tottenham do të luhet për herë të parë jashtë Mbretërisë së Bashkuar. Dy skuadrat londineze do përballen mes tyre në verë në Hong Kong, aty ku do të zhvillojnë përgatitjet parasezonale për sezonin 2025/26.
Derbi është programuar të zhvillohet më datën 31 korrik, në orën 11:30 të paradites sipas kohës së Mbretërisë së Bashkuar dhe do të luhet në stadiumin e ri “Kai Tak”, me kapacitet prej 50,000 vendesh.
Richard Garlick, një nga menaxherët drejtues të Arsenal, thotë se është shumë i emocionuar që “Topçinjtë” do të rikthehen në Hong Kong pas 13 vitesh dhe është i sigurt se i pret një eksperiencë e bukur aty, ku do kenë mundësinë të takohen nga afër me fansat e tyre të shumtë në atë rajon.
“Jemi të emocionuar që do të vizitojmë Hong Kongun në muajin korrik. Është fantastike të rikthehemi atje me ekipin tonë të parë pas 13 vitesh dhe të kemi mundësinë të takohemi aty me shumë prej tifozëve tanë të mrekullueshëm. Të luajmë kundër Tottenham në stadiumin e ri “Kai Tak” do të jetë një eksperiencë e bukur si për skuadrat ashtu edhe për tifozët”, tha Garlick.
