Presidenti Donald Trump tha se ndihej “shumë i zemëruar” pas deklaratave të fundit të Vladimir Putin, i cili vuri në dyshim besueshmërinë e presidentit ukrainas Volodymyr Zelensky.
Duke folur me telefon për rrjetin amerikan NBC News, Trump kritikoi presidentin rus për propozimin e tij për të krijuar një qeveri kalimtare në Kiev që do të nënkuptonte rrëzimin e Zelenskit. “Kjo nuk është rruga e duhur”, theksoi ai.
Presidenti amerikan paralajmëroi se nëse nuk arrin një marrëveshje me Moskën për të ndalur gjakderdhjen në Ukrainë dhe nëse gjykon se Rusia është përgjegjëse – “edhe pse mund të mos jetë” – atëherë ai synon të vendosë tarifa dytësore për naftën ruse.
“Kjo do të thotë se nëse blini naftë nga Rusia, nuk do të jeni në gjendje të bëni biznes në Shtetet e Bashkuara”, tha ai. Siç sqaroi ai, tarifat do të variojnë nga 25% deri në 50% për çdo eksport të naftës ruse.
Trump njoftoi gjithashtu se ai planifikon të flasë sërish me Putinin brenda javës. Deri më tani nuk ka pasur asnjë reagim nga Moska. Rusia shpesh i ka përshkruar sanksionet perëndimore kundër saj si “të paligjshme” dhe, siç pretendon ajo, synon të përfitojë ekonomikisht Perëndimin.
Javën e kaluar presidenti rus propozoi që një qeveri kalimtare të merrte pushtetin në Ukrainë, në mënyrë që të mund të mbaheshin zgjedhjet dhe të nënshkruheshin marrëveshje vendimtare për t’i dhënë fund luftës.
