Një autobus që shërben për ture turistike ka rënë në lumin Po, pranë Piazza Vittorio Veneto në Torino, pasditen e së martës, duke u përmbytur pjesërisht. Mjeti ka goditur tre gra që po kalonin në trotuar dhe ka shkatërruar parapetin e gurit përgjatë Corso Cairoli, përpara se të përfundonte i zhytur në ujë.
Dëshmitë e mbledhura tregojnë se autobusi udhëtonte në drejtimin e kundërt të rrugës. Shoferi u gjet i gjallë nga zjarrfikësit, të cilët e nxorrën me motobarkë, por më vonë mjekët nuk mundën ta shpëtonin. Ai ishte i vetmi pasagjer në momentin kur autobusi përfundoi në lum. Zjarrfikësit thyen xhamat për të kontrolluar nëse kishte pasagjerë të tjerë brenda, por fatmirësisht nuk u gjet asnjë person tjetër.
Ndërkohë, tre këmbësoret që u përfshinë në aksident janë transportuar në spital dhe aktualisht ndodhen jashtë rrezikut për jetën. Autobusi, që ra në lum, ishte në pronësi të kompanisë “Di Carlo Tours e Guglionesi” nga provinca e Campobasso.
Hetuesit dyshojnë se shoferi mund të ketë pësuar një sëmundje të papritur gjatë drejtimit të autobusit. Në vendngjarje janë angazhuar ekipe të zjarrfikësve dhe zhytësve, mjekë të shërbimit të urgjencës, policia lokale që po kryen hetimet, si dhe karabinierët. Zona është patrulluar për një periudhë të gjatë edhe nga helikopteri Drago i departamentit të fluturimit të komandës provinciale të zjarrfikësve.
