Gazetari Almer Toska, i ftuar në programin e drekës në News24, ka analizuar rolin e SPAK në prag të zgjedhjeve parlamentare të 11 majit, duke e cilësuar atë si një faktor kyç që sipas tij do të sjellë tronditje në të dyja kampet politike.
Sipas Toskës, veprimtaria e SPAK në këtë periudhë është determinante, dhe pritet që goditjet e tij të ndodhin para zgjedhjeve, duke ndikuar drejtpërdrejt në dinamikën politike.
“SPAK po luan me ekzistencën e vet sot,” u shpreh gazetari, duke lënë të kuptohet se institucionit i duhet të ndërmarrë veprime vendimtare për të mos u dobësuar pas zgjedhjeve.
Ai përmendi se eksponentë të rëndësishëm të Partisë Socialiste, si zv/kryeministrja Belinda Balluku apo Taulant Balla janë nën shënjestrën e SPAK.
“Belinda Balluku ka mbi 3 vepra të rënda korrupsioni që akuzohet sot. Ajo ka njerëz të korruptuar kudo dhe sot ka konflikt të hapur në PS. Taulant Balla e ka fletën e arrestit gati. Do të ndodhë tani, më 9 maj apo 10 maj nuk dihet… është faktor i rëndësishëm sepse ose SPAK do të godasë tani, ose do t’i pritet bileta pas zgjedhjeve,” tha Toska mes të tjerash, duke shtuar se asnjë forcë politike nuk e dëshiron SPAK-un në formën aktuale.
Ai përmendi edhe komisionin Xhafaj, si një përpjekje të Partisë Socialiste për të vënë nën kontroll SPAK-un, duke sugjeruar një klimë të tensionuar mes drejtësisë dhe politikës.
