Washington, 3 mars 2025- Presidenti i SHBA, Donald Trump, ka konfirmuar vendosjen e tarifave 25% për Kanada dhe Meksikë, duke theksuar se nuk ka mundësi për këto dy shtete të shmangin këtë masë. Tarifat do të hyjnë në fuqi të martën, më 4 mars.
“Nuk ka më vend për Meksikën apo Kanadanë,” tha Presidenti Trump në përgjigje të pyetjeve mbi mundësinë e një marrëveshjeje që do të frenonte fluksin e fentanilit në SHBA, që vjen nga këto dy shtete.
Vendimi për vendosjen e tarifave ishte paralajmëruar disa javë më parë, kur Trump tha se do të aplikonte një tarifë prej 25% për mallrat që importohen nga Kanada dhe Meksikë, për shkak të dështimit të këtyre shteteve për të frenuar trafikun e drogave, sidomos fentanilit, që përbën një kërcënim serioz për sigurinë në SHBA.
Po ashtu, Trump njoftoi një tarifë shtesë prej 10% për Kinën, duke i dhënë një përgjigje masave të ngjashme që Pekini ka vendosur ndaj produkteve amerikane. Ai theksoi se një pjesë e madhe e drogës që hyn në SHBA prodhohet në Kinë dhe furnizohet nëpërmjet Meksikës dhe Kanadasë.
Në fillim të këtij muaji, Presidenti Trump kishte shtyrë vendosjen e tarifave për një muaj, pasi Presidentja meksikane Claudia Sheinbaum u angazhua të dërgonte 10,000 trupa për të kontrolluar trafikun e drogës në kufirin me SHBA-në. Po ashtu, Kryeministri kanadez Justin Trudeau kishte deklaruar se do të emëronte një zyrtar për të trajtuar çështjen e fentanilit.
Nëse këto masa nuk sjellin rezultatet e dëshiruara, Meksika mund të vendosë tarifa ndaj produkteve amerikane, ndërsa Kanada ka paralajmëruar një kundërpërgjigje me tarifa 25% për produktet amerikane të çelikut dhe aluminit.
Shumë ekonomistë paralajmërojnë se këto tarifa mund të çojnë në rritje të çmimeve për konsumatorët dhe kostoja e materialeve për bizneset, duke ndikuar negativisht në inflacionin në SHBA. Për më tepër, Trump ka bërë të ditur se tarifat mund të vendosen edhe ndaj importeve të tjera, përfshirë ato në automobila, produkte farmaceutike, dhe lëndë drusore.
Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.
