Gjëja më e bukur e Shqipërisë janë tifozët. Nëse Kombëtarja Shqiptare ka shkuar dy herë në Europian, tifozët shkojnë çdo vit në Europian dhe Botëror, nëse do të jetë krahasimi për mbështetjen që ata japin për ekipin, krahasimisht me tifozët e Kombëtareve të tjera. Kjo u pa më së miri edhe në Gjermani, ku tifozët shqiptarë ishin në mesin e 3 Kombëtareve më mbështetjen më të flaktë në Europian, pavarësisht se aspiratat e ekipit tonë ishin të vogla dhe ndodheshim në një grup të pamundur.
Disa rekorde të vendosura në Gjermani, por duket se entuziazmi i shqiptarëve nuk ka rënë edhe pas asaj ecurie jo të mirë në Ligën e Kombeve. Këtë herë në Angli pritet të dhurohet një spektakël i vërtetë. Kjo edhe për shkak të emgirimit të madh të shqiptarëve në këtë vend, ndeshja kundër Anglisë në transfertë do të jetë si në shtëpi. Sipas parashikimeve të para, është e sigurt se në stadium do të jenë më shumë se 20.000 tifozë shqiptarë. Për ndeshjen Angli-Shqipëri që do të luhet në 21 mars kishte “Sold Out” të biletave që në datën 5 shkurt. Rreth 1 muaj e gjysmë përpara këtij takimi, janë shitur të gjitha biletat. Sigurisht, nuk mund të ketë kurrsesi një interes kaq të madh të anglezëve për Kombëtaren e tyre në një ndeshje kundër Shqipërisë. Ashtu siç e tha edhe kreu i FSHF, Armand Duka, një gjë të tillë nuk ka arritur ta bëjë më parë asnjë ekip i Ballkanit dhe i Europës. Në Angli janë të çuditur tërësisht nga mënyra sesi avulluan biletat dhe janë të ndërgjegjshëm se shumë bileta në krahun e Anglisë, janë blerë vetëm nga tifozët e Shqipërisë.
Dhe për mbështetur këtë ide sesa shumë shqiptarë do të ketë në stadium në atë transfertë, vjen një tjetër publikim i Federatës Angleze të Futbollit. Ata po nxisin tifozët që të blejnë biletat për ndeshjen e dytë që do të ketë Kombëtarja e tyre kundër Letonisë. Anglia do të luajë dy takime në shtëpi në mars, në datën 21 kundër Shqipërisë dhe 3 ditë më vonë do të presin Letoninë. Por pavarësisht se sot është data 22 shkurt dhe kanë kaluar shumë ditë që nga Sold Out i biletave që patën për ndeshjen me Shqipërinë, ka ende shumë bileta të mbetura dhe tifozët nuk kanë shprehur asnjë interesim për takimin që do të ketë Anglia kundër Letonisë.
E gjitha kjo panoramë të jep jë krenari të madhe dhe të gjithë mezi po presin për të parë spektaklin që do të ofrojnë shqiptarët në një stadium si Ëembley që e ka kapacitetin maksimal në 90.000 vënde. Por nga ana tjetër të jep edhe një ndjesi keqardhje pasi vetëm në raste të tilla kuptohet sesi shqiptarët e kanë braktisur vendin e tyre dhe sa shumë ndodhen në Angli, Gjermani apo edhe në vende të tjera të Europës. Mjafton vetëm një ndeshje e Shqipërisë, për të kuptuar realisht shifrën e largimit masiv. /Sport Ekspres/
