Deco dhe Bojan kanë folur hapur për merkaton e Barcelonës dhe kanë përmendur edhe emrin që mbetet një nga pengjet më të mëdha të drejtimit sportiv: Luis Díaz.
Në intervistën për Catalunya Ràdio, dy drejtuesit e Barcelonës e cilësuan kolumbianin si transferimin e madh që do të kishin dashur të realizonin gjatë periudhës së tyre në krye të merkatos, por që në fund nuk u konkretizua.
Përveç Luis Díaz, një nga temat kryesore ishte edhe e ardhmja e Alejandro Baldes, i cili ka pasur më pak minuta në javët e fundit.
“Balde është një djalë fantastik. Është në një situatë jo të rehatshme sepse dëshiron të luajë. Është ende një lojtar i rëndësishëm për ne dhe është gati kur trajneri ta ketë nevojë”, deklaroi Bojan.
I pyetur nëse shitja e mbrojtësit është një mundësi për merkaton e janarit, Deco ishte i qartë:
“Jo. Pastaj ekziston edhe ana e lojtarit, por ai nuk na ka thënë se është i pakënaqur.”
Drejtuesit e Barcelonës folën edhe për mundësinë e afrimit të një qendërmbrojtësi në janar. Deco pranoi se gjithçka mbetet e hapur, por theksoi se klubi duhet të analizojë me kujdes situatën së bashku me trajnerin.
Bojan shtoi se në diskutimet me stafin teknik, pozicioni i qendërmbrojtësit është konsideruar i mbuluar, sidomos kur Andreas Christensen është në dispozicion.
Deco e vlerësoi skuadrën aktuale me notën “10 nga 10”, duke theksuar se kjo ishte vera e parë ku Barcelona kishte mundësi të planifikonte më lirshëm pas vështirësive të viteve të fundit me “fair play”-in financiar.
Një tjetër temë ishte Raphinha, të cilin Bojan e vlerësoi për përshtatjen në rolin e sulmuesit qendror.
“Raphinha po na tregon të gjithëve se mund të jetë një ‘9’. Po jep një nivel shumë të lartë performance”, deklaroi ai.
Mes situatës së Baldes, diskutimeve për qendërmbrojtësin dhe vlerësimit maksimal për skuadrën aktuale, emri i Luis Díaz mbetet ai që Deco dhe Bojan e shohin si transferimin e madh të munguar të Barcelonës gjatë periudhës së tyre në drejtimin sportiv.











