Usman Nurmagomedov është dënuar me gjashtë muaj burg pas përplasjes së dhunshme me Merab Dvalishvilin në Abu Dhabi.
Sipas raportimit, incidenti ndodhi në një hotel, teksa Dvalishvili po jepte një intervistë. Nurmagomedov ishte i shoqëruar nga vëllai i tij dhe disa persona të tjerë, ndërsa situata degjeneroi në një përleshje të rëndë.
Autoritetet ndërhynë pasi videot e incidentit u përhapën me shpejtësi në rrjetet sociale.
Nurmagomedov është dënuar gjithashtu me një gjobë prej 300 mijë dirhamësh, rreth 27 mijë euro, ndërsa pas përfundimit të dënimit pritet të dëbohet nga Emiratet e Bashkuara Arabe.
Sipas njoftimit të Departamentit Gjyqësor të Abu Dhabit, edhe pesë anëtarë të tjerë të grupit që morën pjesë në përleshje kanë marrë të njëjtin dënim: gjashtë muaj burg, gjobë dhe dëbim pas vuajtjes së dënimit.
Dy persona që filmuan dhe publikuan pamjet e sherrit janë ndëshkuar gjithashtu me të njëjtën masë, për shkelje të privatësisë dhe publikim të pamjeve të incidentit.
Ndërkohë, Merab Dvalishvili dhe Saba Lazishvili janë liruar pas ndalimit dhe janë gjobitur me nga 50 mijë dirhamë, afërsisht 4,500 euro.
Ngjarja ka shkaktuar reagime të shumta në botën e sporteve luftarake, ndërsa pasojat ligjore për grupin e përfshirë kanë ardhur menjëherë.
