Helidon Bushati ka hequr dorë nga gara e Primareve të Partisë Demokratike për t’u bërë kandidat për deputet, në kuadër të zgjedhjeve parlamentare të 11 majit.
Përmes një postimi në rrjetet sociale, Bushati thotë se ka zgjedhur të mos marr pjesë në primare dhe si rrjedhojë të heqë dorë nga aspirata për të qenë kandidat për deputet.
Ai thekson se ky nuk është thjeshtë një vendim personal, por është një akt përgjegjësie politike dhe morale. Bushati shprehet se ky vendim nuk do të thotë tërheqje nga rrugëtimi i përbashkët i Partisë Demokratike.
Postimi i plotë:
Të dashur miq,
Partia Demokratike është përballë sfidave të mëdha. Kjo forcë politike ja doli të kapërcejë momente të vështira që e vunë deri në provën e ekzistencës. Sot demokratët janë të bashkuar dhe po bëhen gati për zgjedhjet jetike për vendin, ato të 11 Majit.
Përveçse për angazhim, koha është dhe për reflektim. Së shpejti, Partia Demokratike do të hyjë në një proçes të rëndësishëm, atë të primareve.
Personalisht, kam zgjedhur të mos mos marr pjesë në primare dhe si rrjedhojë heq dorë nga aspirata për të qenë kandidat për deputet. Ky nuk është thjeshtë një vendim personal, është një akt përgjegjësie politike dhe morale.
Gjithsesi, ky vendim nuk do të thotë tërheqje nga rrugëtimi ynë i përbashkët. Përkundrazi, do të jem aty ku kam qenë gjithmonë, pranë Partisë Demokratike dhe demokratëve.
Koherent në bindjet e mia, i palëkundur në vlerat për të cilat kemi luftuar, dhe plotësisht i angazhuar për ringritjen dhe fitoren që synojmë te gjithë për Partinë Demokratike dhe liderin e saj Sali Berisha.
Jam i bindur, më shumë se kurrë, se MODERNIZIMI dhe PËRBASHKIMI janë çelësi i fitores. Ja kemi borxh fëmijëve tanë, ja kemi borxh historisë!
Së bashku drejt fitores!
