Kimi Antonelli është shpallur kampion bote në Formula 1 pas vendit të tretë në Çmimin e Madh të Meksikës, duke kurorëzuar një sezon historik në moshën vetëm 20-vjeçare.
Gara u fitua nga Max Verstappen, ndërsa Lewis Hamilton u rendit i dyti. Podiumi solli kështu një skenë simbolike, me dy nga emrat më të mëdhenj të epokës së fundit përkrah kampionit të ri të botës.
Antonelli bëhet italiani i parë që fiton titullin që prej vitit 1953.
Gara nisi me tension të madh mes dy Ferrari-ve. Hamilton ruajti pozicionin nga pole position, ndërsa Leclerc tentoi një manovër agresive në kthesat e para. Të dy dolën jashtë vijës ideale dhe Leclerc përfitoi duke prerë pistën, por më pas mori një penalizim prej pesë sekondash.
Ky episod i kushtoi shtrenjtë Ferrarit dhe i hapi rrugën Verstappenit drejt kreut.
Në mesin e garës erdhi edhe një moment dramatik, kur Bottas pësoi një aksident të rëndë pas një problemi në pezullimin e përparmë. Gara u ndërpre me flamur të kuq për rreth 40 minuta.
Pas rinisjes, Verstappen ruajti avantazhin përballë presionit të Hamiltonit, ndërsa Antonelli kaloi Leclerc dhe u ngjit në vendin e tretë.
Një tjetër Safety Car në fund afroi sërish makinat, por Verstappen rezistoi deri në flamurin me kuadrate dhe siguroi fitoren e tretë të sezonit.
Megjithatë, protagonisti i madh i mbrëmjes ishte Antonelli. Vendi i tretë i mjaftoi për të siguruar matematikisht titullin dhe për t’u kurorëzuar kampioni i ri i botës në Formula 1.
