Presidenti Donald Trump deklaroi të shtunën në mbrëmje se Flavio Bolsonaro, kandidati i mundur në zgjedhjet presidenciale të Brazilit, mund të qëndrojë në Shtetet e Bashkuara për një kohë të pacaktuar.
Komentet, të bëra për gazetarët gjatë një feste me rastin e Halloween-it në klubin e Trumpit, Mar-a-Lago, në Florida, sugjerojnë se marrëdhëniet mes dy demokracive më të mëdha të hemisferës perëndimore mund të mbeten të tensionuara edhe për njëfarë kohe, pavarësisht se sekretari amerikan i Shtetit, Marco Rubio, zhvilloi më herët gjatë ditës një bisedë me kryediplomatin e Brazilit, shkruan Reuters.
«Ai mund të qëndrojë këtu për aq kohë sa të dëshirojë», tha Trump për Bolsonaron, i cili u largua nga Brazili pasi humbi zgjedhjet përballë presidentit aktual të majtë, Luiz Inácio Lula da Silva, ndonëse kryesonte në shumicën e sondazheve të opinionit publik. «Sipas mendimit tim, zgjedhjet ishin një turp».
Ambasada braziliane në Uashington nuk iu përgjigj menjëherë një kërkese për koment.
Vëzhgues të jashtëm i cilësuan zgjedhjet si të lira dhe të ndershme. Vendimi i Bolsonaros për t’u larguar drejt SHBA-së erdhi pasi një gjyqtar i Gjykatës së Lartë të Brazilit urdhëroi heqjen e pasaportës së tij, pak pas humbjes në zgjedhje. Kandidati po përballet me dy hetime federale për pastrim parash në Brazil, ndërsa policia atje e konsideronte atë si një person që mund të largohej për t’iu shmangur drejtësisë.
Siç ka raportuar më parë Reuters, ai u pranua në Shtetet e Bashkuara përmes statusit të lejes humanitare të qëndrimit (humanitarian parole), një status që zakonisht zgjat vetëm një vit.
Më herët të shtunën, Rubio tha se kishte zhvilluar një bisedë me ministrin e Jashtëm të Brazilit, Mauro Vieira, gjatë një takimi të Grupit të 20 vendeve në Atlanta dhe se të dy do të takoheshin sërish pas disa javësh.
Në komente që linin të kuptohej mundësia e një afrimi mes palëve, Rubio u tha gazetarëve se ai dhe Vieira pritej të takoheshin sërish në Francë, në samitin e ministrave të Jashtëm të G7-s, që do të zhvillohet muajin e ardhshëm. Brazili pritet të marrë pjesë në këtë takim si vëzhgues, vuri në dukje ai.
Një zyrtar amerikan dhe një person i njohur me çështjen i kanë thënë Reuters se Trump nuk ka aktualisht plane për të mbështetur ambiciet politike të Bolsonaros, i cili e ka cilësuar veten si udhëheqësin legjitim të Brazilit, pavarësisht se lejoi hyrjen e politikanit brazilian në SHBA. Të shtunën, Trump tha se nuk ka plane të takohet me Bolsonaron.
Rubio deklaroi të shtunën se qeveria amerikane «nuk ishte e përfshirë drejtpërdrejt në asnjë prej veprimeve» që çuan në largimin e Bolsonaros nga Brazili në fillim të kësaj jave. Megjithatë, Reuters dhe disa media të tjera kanë raportuar se Jason Miller, një zyrtar i Shtëpisë së Bardhë, ndihmoi në organizimin e udhëtimit të Bolsonaros.
Babai i Bolsonaros, ish-presidenti i ekstremit të djathtë Jair Bolsonaro, ndodhet në burg në Brazil, pasi u dënua për komplot për grusht shteti pas humbjes së tij në përpjekjen për t’u rizgjedhur në vitin 2022. Vetë Lula kaloi 17 muaj në burg gjatë viteve 2018 dhe 2019, nën akuza për korrupsion, të cilat më vonë u anuluan.
